Undangan saruan di hari Minggu rancak kada hanya saikung dua. Si anu meundang anak kawinan, si anu meundang jua, sama tia anak kawin, si anu iya jua meundang aqiqah cucu. Belum lagi jika ada nang lain, siapa siapakah, beundangan acara jua.

Banyak kawan banyak jua undangan datang. Dari kawan sekolah, keluarga, patuhan hingga kawan babisnis. Wahini pulang tetangga sekomplek bakawinan, kenal kada kenal bahanu ada undangan masuk ke rumah.

Rancak ada yang koler turun basaruan. Alasan macam-macam: dari jauh lokasinya, kadada waktunya, pas aral ada kematian, kada tapi kenal wan yang meundang, atau pas sibuk ada nang digawi atau pas kada tapi baduit.

Bujur lah ?

Hari Minggu ini pian ada berapa undangan saruan? Kawalah sabarataan ditulaki ?

Nang penting jua, mun makan di saruan baingat lah. Jangan mata pina saraba handak ini itu melihat banyak menu di meja. Ada rawon, bakso, sate, gado-gado, soto, gulai ayam, daging kambing, ketupat Kandangan.

Nang kolestrol baingat sadikit. Kalo pina takajut hanyut banar ai. Tahu aja kalo pamantang. Apalagi mun awak kada bigas kaya waktu anum. Urang wahini jarang nang kada baisian salah satu: diabetes, asam urat, gula darah tinggi, batis kada kuat badiri lawas, tangan bagarak-garak, mata sasain kaur, awak lakas uyuh, jantung, stroke, kanker dan cuci darah.

Bahanu pas tatamu kawan di acara saruan sambil makan bapandiran takaluar habar si anu garing anu, si anu masuk rumah sakit samalam, si anu handak operasi, si anu lawas kada telihat sakalinya sudah kadada lagi alias “sudah bulik”.

Ayuha basyukur haja mun pian masih kawa makan nyaman dan kawa datang di saruan sambil basilaturahmi. Ujar pulang silaturahmi mamanjangkan umur.

Sampai di sini hulu kisah di hari Minggu. Kaina disambung pulang bila ada kisah hanyar. AH